ستلج میں بھارت کے پانی چھوڑنے سے تباہی، مزید علاقے زیر آب آگئے

بھارت کی جانب سے پانی چھوڑنے کے بعد دریائے ستلج میں گنڈا سنگھ والا کے مقام پر بہاؤ میں مزید اضافہ ریکارڈ کیا گیا ہے۔ فلڈ فورکاسٹنگ ڈویژن لاہور کے مطابق، گنڈا سنگھ والا پر پانی کا بہاؤ بڑھ کر 1,95,899 کیوسک تک پہنچ گیا ہے، جس سے علاقے میں شدید سیلابی صورت حال پیدا ہو گئی ہے۔

دریائے ستلج میں بہاولپور اور بہاولنگر کے مقام پر پانی کی سطح بڑھنے سے کئی دیہات زیر آب آ گئے ہیں، جبکہ مکانات اور ہزاروں ایکڑ زرعی زمین کو شدید نقصان پہنچا ہے۔

بورے والا میں ساہوکا اور ملحقہ علاقے بھی پانی میں ڈوب گئے ہیں، اور ساہوکا چشتیاں روڈ میں شگاف پڑنے کی وجہ سے سیکڑوں دیہاتوں کا زمینی رابطہ منقطع ہو گیا۔

سیلابی صورتحال کے باعث کشتیوں کے ذریعے لوگوں کو محفوظ مقامات پر منتقل کیا جا رہا ہے۔

دریائے چناب میں سیلاب کے خدشات کے پیش نظر مقامی لوگوں کو مساجد سے محفوظ مقامات کی جانب رہنمائی کی جا رہی ہے۔ بھارتی اقدامات کے باعث ساڑھے 3 لاکھ کیوسک کے سیلابی ریلے کے آنے کا خدشہ ہے۔

ادھر ہیڈ سلیمانکی اور دریائے راوی کے جسڑ کے مقام پر درمیانے درجے کا سیلاب ہے، جہاں پانی کا بہاؤ 82,140 کیوسک تک پہنچ گیا ہے۔

دریائے سندھ میں کوٹری بیراج پر بھی نچلے درجے کا سیلاب آ گیا جہاں پا نی کی آمد 2 لاکھ 17 ہزار 490 کیوسک ریکارڈ کی گئی۔

سکھر بیراج پر درمیانے درجے کا سیلاب برقرار ہے، تربیلا، کالا باغ، چشمہ اور گڈوپر بھی نچلے درجے کے سیلاب ہیں۔