میئر کراچی نے کہا کہ افسوس کے ساتھ کہنا پڑتا ہے کہ ہر واقعے پر سیاست کی جاتی ہے۔ انہوں نے انتظامیہ کے ساتھ مکمل رابطے میں ہونے اور بچے کی تلاش کے عمل کے مسلسل جاری رہنے کی تصدیق کی۔
مرتضیٰ وہاب نے بچے کے والدین سے ہمدردی کا اظہار کرتے ہوئے کہا کہ وہ اس سانحے پر دل سے غمگین ہیں۔
میئر نے اعلان کیا کہ واقعے کی مکمل تحقیقات کی جائیں گی اور جہاں بھی کوتاہی پائی گئی، ذمہ داران کے خلاف سخت کارروائی ہوگی۔ انہوں نے ایم ڈی واٹر بورڈ کو فوری تحقیقات کا حکم بھی دیا ہے۔
انہوں نے عوام کو مشتعل کرنے والی گفتگو اور الزام تراشی سے بچنے کی ہدایت کرتے ہوئے کہا کہ یہ مسائل کے حل میں رکاوٹ بنتی ہیں، تاہم ریسکیو آپریشن جاری ہے اور واقعہ کے مقام کے 500 میٹر کے حصے میں کھدائی بھی کی جا چکی ہے۔
میئر نے مزید کہا کہ گزشتہ ایک سال میں تقریباً 88 ہزار گٹروں کے ڈھکن لگائے جا چکے ہیں اور ہیلپ لائن کے ذریعے ڈھکن لگوانے کی درخواستیں وصول کی جاتی ہیں، لیکن جہاں بچہ گر گیا، وہاں ایسی کوئی درخواست موصول نہیں ہوئی تھی۔
مرتضیٰ وہاب نے کہا کہ آج کے ایم سی اسپورٹس کمپلیکس کے افتتاح کا فیصلہ بھی اسی دکھ کی وجہ سے مؤخر کردیا ہے۔
انہوں نے یقین دہانی کرائی کہ ذمہ داروں کو سزا ملے گی اور پوری کوشش کی جائے گی کہ مستقبل میں ایسے دلخراش واقعات دوبارہ پیش نہ آئیں۔
میئر کراچی کے مطابق ڈپارٹمنٹل اسٹور کے سامنے کھلے مین ہول یا برساتی نالے کی صورتحال بھی تحقیقات کا حصہ ہے، تاکہ اصل حقائق سامنے لائے جا سکیں۔
0 تبصرے