وزیراعظم کے بعد ان کی ٹیم کے کرونا ٹیسٹوں کی رپورٹس بھی سامنے آگئیں، وزیراعظم ہاوس میں موجود تمام عملے کے ٹیسٹ منفی آئے، عمران خان کا ٹیسٹ بھی منفی آیا تھا۔ تفصیلات کے مطابق بتایا گیا ہے کہ وزیراعظم عمران خان کے علاوہ ان کے دفتر کی ٹیم کے کرونا وائرس ٹیسٹ بھی کیے گئے ہیں۔ وزیراعظم سمیت ان کی ٹیم کے کرونا ٹیسٹ کی رپورٹس بھی منفی آئی ہیں۔
اس حوالے سے وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ وزیراعظم عمران خان کا کورونا وائرس کا ٹیسٹ منفی آیا ہے۔ بدھ کو اپنے ایک ٹویٹ میں انہوں نے کہا کہ خوشی ہے کہ وزیراعظم عمران خان کا کورونا وائرس کا ٹیسٹ نیگیٹو آیا ہے۔
واضح رہے کہ وزیراعظم عمران خان نے 15 اپریل کو ایدھی فاؤنڈیشن کے سربراہ فیصل ایدھی سے ملاقات کی تھی جن کا کورونا ٹیسٹ مثبت آیا تھا۔
اس کے بعد وزیراعظم عمران خان کا بھی کورونا ٹیسٹ کیا گیا جس کی رپورٹ بدھ کے شام کو آئی۔ وزیراعظم کا کورونا ٹیسٹ منفی آیا۔شوکت خانم اسپتال کے ماہرین نے گزشتہ روز وزیراعظم کے نمونے لیے تھے۔خوش قسمتی سے وزیراعظم اس مہلک وائرس سے محفوظ ہیں۔قبل ازیں وزیراعظم عمران خان کی مشیرِ اطلاعات ڈاکٹر فردوس عاشق اعوان نے کہا تھا کہ وزیراعظم اور انکی فیملی کا ایک ٹیسٹ پہلے ہوچکا تھا جس کا نتیجہ منفی آیا تاہم اب فیصل ایدھی سے ملاقات کے بعد انکا دوبارہ ٹیسٹ کیا گیا۔
فردوس عاشق اعوان نے نجی ٹی وی چینل سے گفتگو کرتے ہوئے بتایا ہے کہ وزیراعظم آفس کو روزانہ ڈس انفیکٹ کیا جاتا ہے، جبکہ پورے وزیراعظم ہاؤس کو روٹیشن میں ڈس انفیکٹ کیا جاتا ہے، فیصل ایدھی نے وزیراعظم کو کورونا فنڈ کیلئے چیک دیا تھا لیکن انکا ٹیسٹ پازیٹو آنے کے بعد وزیراعظم کا ٹیسٹ کروانے کا فیصلہ کیا گیا۔
0 تبصرے