بیگم کو گھر سے نکالنے پر قید کی سزا تجویز، قومی اسمبلی میں بل پیش کردیا گیا

قومی اسمبلی میں خواتین کو غیر منصفانہ طور پر گھر سے بے دخل کرنے کو سزا یافتہ جرم قرار دینے کے لیے ترمیمی بل پیش کر دیا گیا ہے۔ منگل کو قومی اسمبلی کے اجلاس میں پیپلز پارٹی کی رکن شرمیلا فاروقی نے تعزیرات پاکستان کی مختلف شقوں میں ترامیم کا بل ایوان میں پیش کیا۔

بل میں تجویز دی گئی ہے کہ شوہر یا گھر کے کسی اور فرد کی جانب سے غیر منصفانہ طور پر خاتون کو گھر سے نکالنا جرم قرار دیا جائے اور اس جرم پر 3 سے 6 ماہ قید کی سزا دی جائے۔

مزید یہ کہ، خاتون کو گھر سے نکالنے والے پر 2 لاکھ روپے تک جرمانہ بھی عائد کیا جا سکتا ہے، اور ایسے مقدمات کی سماعت کا مجاز فرسٹ کلاس مجسٹریٹ ہوگا۔

مجوزہ ترمیمی بل کو فوجداری قانون ترمیمی بل 2025 کا نام دیا گیا ہے، ڈپٹی اسپیکر نے بل کو مزید غور کے لیے متعلقہ کمیٹی کے سپرد کر دیا۔