سیلاب کے بعد سوات، اسلام آباد کے مختلف حصوں میں زلزلے کے شدید جھٹکے، لوگوں میں خوف و ہراس

اسلام آباد اور خیبر پختونخوا کے مختلف شہروں میں زلزلے کے جھٹکے محسوس کیے گئے۔ رپورٹس کے مطابق زلزلے کے جھٹکے جڑواں شہروں اسلام آباد، راولپنڈی، پشاور، سوات، ایبٹ آباد اور چترال میں محسوس کیے گئے، جس سے عوام میں خوف و ہراس پھیل گیا۔

محکمہ موسمیات کے مطابق زلزلے کی شدت ریکٹر اسکیل پر 5.2 ریکارڈ کی گئی جبکہ اس کا مرکز افغانستان کے ہندوکش پہاڑی سلسلے میں تھا۔

زلزلہ صبح 10 بج کر 20 منٹ پر آیا اور اس کی گہرائی 190 کلومیٹر ریکارڈ کی گئی۔

جھٹکوں کے باعث شہری گھروں، دفاتر اور دکانوں سے دعائیں پڑھتے ہوئے باہر نکل آئے۔

ابتدائی اطلاعات کے مطابق کسی قسم کے جانی یا مالی نقصان کی اطلاع موصول نہیں ہوئی۔